نتلاقى وين ضل السحاب ما خت بصمه على الجروف
لاغنت اسراب النوارس نقرت افراح الدفوف
نتلاقى وين ؟؟
لو ريحة الطين فى الجروف لسع بتنضح خير وفال
لو موجة النيل راقصت نخلا متكى سبيطو شال
لو العيون رجعت غفت أحلاما ما صبحت محال
نتلاقى يوم باكر أكيد وافراحنا تصبح كرنفال
نتلاقى وين ؟؟
نتلاقى فى ضحكة طفل بيغنى ماشى المدرسه
نتلاقى فى بيوت الفريق البي المحنه مملسه
فى نظرة الناس البساط العايشت ليل الأسى
فى حلم اتنين عِاشقين ما عاشو يوم لحظة قسى
نتلاقى وين ؟؟
فى غفوة الرمش السهر ليل العذاب الطال زمن
فى رفه لى جنحين فراش سوى العبير سكنه ووطن
فى ضحكة الزول البسيط لو كان فصيح أو كان رطن
فى دفء أصابع فى سلام دافى وحنين ما فيهو ظن
نتلاقى وين ؟؟
موضوع: نتلاقى وين ؟؟ 
السبت يونيو 05, 2010 6:53 pm
